ការសម្រិតសម្រាំងពូជស្រូវ
កសិករភាគច្រើនបានធ្វើការសម្រិតសម្រាំងពូជស្រូវរបស់ខ្លួនតាមវិធីផ្សេងៗ ដើម្បីទុកយកទៅដាំដុះក្នុងរដូវ ឬឆ្នាំក្រោយ ។ តែកសិករមួយភាគធំ នៅតែជួបប្រទះបញ្ហាពូជលាយច្រើនដដែល នេះប្រហែលជាពួកគាត់មិនបានធ្វើដោយការប្រុងប្រយ័ត្ន ។
តើហេតុអ្វីបានជាគេត្រូវធ្វើការសម្រិតសម្រាំងពូជស្រូវ ?
ពីព្រោះគ្រាប់ពូជសុទ្ធល្អៈ ទទួលបានទិន្នផលខ្ពស់, មានតម្លៃទីផ្សារ, អាចដុះលូតលាស់បានល្អ, អាចរក្សាទុកបានយូរ, វានឹងមិនបណ្ដាលឱ្យអង្ករបាក់ច្រើននៅពេលកិន ពោលគឺគ្រាប់អង្គរមានគុណភាពល្អ ។
តើធ្វើដូចម្ដេចទើបដឹងថាដើមស្រូវខុសគ្នា ?
គេត្រូវមើលលក្ខណៈមួយចំនួនដូចជាៈ កម្រិតខ្ពស់ និងទាប, ពណ៌ដើម ឬស្លឹក, បែកគុម្ពក្រញាង ឬកញ្ចុំ, ចេញផ្កាមុនឬក្រោយ, ស្លឹកស្រូវតូចធំ ខ្លី ឬវែង, គ្រាប់ស្រូវតូចធំ ខ្លី ឬវែង, និងពណ៌នៃគ្រាប់ស្រូវ ។
តើចុងគ្រាប់ស្រូវមានអុជពណ៌ត្នោត ឬពណ៌ស្វាយឬទេ ?
- តើមានកន្ទុយ ឬអត់កន្ទុយ
- កួរស្រូវបែកក្រញាង ឬកញ្ចុំ
- ទំហំស្លឹកអបកួរស្រូវ
គេត្រូវច្រូតកាត់ស្រូវក្នុងផ្នែកបន្សុទ្ធពូជ បោកបែន និងរក្សាទុកដាក់ដោយឡែកពីគេ និងដោយប្រយ័ត្នប្រយែងជាទីបំផុត ។
តើគេគួរធ្វើការសម្រិតសម្រាំងពូជដូចម្ដេចទើបងាយស្រួល និងបានល្អ ?
ឧបមាថា មានស្រែពីរកន្លែង មួយកន្លែងនៅក្បែរផ្ទះដែលមានទំហំ ២០អារ និងមួយកន្លែងទៀតឆ្ងាយពីផ្ទះ ដែលមានទំហំ ៤០អារ ។ ស្រែទាំងពីរនេះធ្វើពូជតែមួយដូចគ្នាហើយគេត្រូវការគ្រាប់ពូជសម្រាប់ស្រែទាំងពីរចំនួន១០០គ.ក ។
លំដាប់នៃការអនុវត្តៈ គេត្រូវជ្រើសរើសផ្នែកណានៃស្រូវដុះស្មើគ្នា និងល្អជាងគេ ត្រូវប៉ាន់ទំហំប៉ុន្មានដែលអាចទទួលបានផលយ៉ាងតិច១២០គ.ក ។ ឧទាហរណ៍ៈ មួយហិចតាបានផលជាមធ្យម២តោន ឬ ១០០អារឲ្យផល២០០០គ.ក នោះគេអាចត្រូវការផ្ទៃដី៦អារ ។
ការជ្រើសរើសផ្ទៃដីធ្វើសម្រិតសម្រាំងពូជៈ ច្រូតកាត់ឲ្យបានមុនគេ, បោកបែនដោយឡែក, ហាលដោយឡែក, ច្រកទុកបាវដោយឡែក ។
ឆ្នាំទីពីរ
គេត្រូវជ្រើរើសកន្លែងសម្រាប់ការធ្វើសម្រិតសម្រាំងពូជនៅឆ្នាំបន្ដទៀតៈ ជ្រើសរើសយកកូនស្រែដែលនៅជិតផ្ទះពីព្រោះងាយស្រួលក្នុងការថែទាំ ហើយដីស្រែត្រូវមានជីជាតិ រាបស្មើ និងងាយស្រួលក្នុងការបញ្ចេញបញ្ចូលទឹក ។
ធ្វើការកំណត់ទំហំកូនស្រែសម្រាប់សម្រិតសម្រាំងពូជៈ ប្រសិនបើផលទទួលបាន២តោន នោះបានន័យថា ក្នុងមួយអារ (១០ម x ១០ម) គឺបានផល២០គ.ក ។ ដូចនេះបើឲ្យបាន១០០គ.ក គេត្រូវការផ្ទៃដី៥អារ ។ ប៉ុន្ដែគេត្រូវកំណត់យកផ្ទៃដី៦អារ ព្រោះវាអាចបាត់បង់ដោយមូលហេតុផ្សេងៗ ។
ធ្វើការកំណត់ចំនួនពូជស្រូវប៉ុន្មានគីឡូក្រាមសម្រាប់ផ្ទៃដី៦អារៈ គេដឹងថាក្នុងមួយហិចតាគេប្រើពូជ១០០គ.ក ហើយក្នុងមួយហិចតាស្មើ១០០អារ ដូចនេះក្នុងមួយអារ គេត្រូវការគ្រាប់ពូជមួយគីឡូក្រាម ។ ដោយគេមានដី៦អារនោះគេត្រូវការគ្រាប់ពូជ៦គ.ក ។
ការអនុវត្តការដាំដុះ: យកពូជ៦គ.ម ពីពូជ១០០គ.កដែលបានសម្រិតសម្រាំងនៅឆ្នាំទីមួយមកសាបដោយឡែកដោយ ៖
- ធ្វើថ្នាលឲ្យបានស្អាត និងស្មើល្អ
- លើកកូនភ្លឺព័ទ្ធជុំវិញ
- ភ្ជួររាស់ និងពង្រាបដី៦អារនោះឲ្យបានរាបស្មើ កម្ចាត់ស្មៅឲ្យបានស្អាតល្អ គ្មានដុះមួរ ឬសារ ។ល ។
- មិនត្រូវទុកសំណាបឲ្យចាស់ជ្រុលពេក
- ការកាត់ពូជលាយគឺត្រូវធ្វើដូចកាលឆ្នាំទីមួយ
- ការច្រូតកាត់បោកបែន ហាល សម្អាត និងទុកដាក់គឺត្រូវធ្វើដូចកាលឆ្នាំទីមួយដែរ
ឆ្នាំទីបី និងឆ្នាំបន្ដបន្ទាប់
- ត្រូវធ្វើដូចកាលឆ្នាំទីពីរ ទាំងនៅលើស្រែកសិករសម្រាប់សម្រិតសម្រាំងពូជ៥ហិចតា និងស្រែដែលនៅសល់ ។
- បើគេត្រូវការសម្រិតសម្រាំងពូជស្រូវពីរ ឬផ្សេងៗគ្នានៅពេលតែមួយ គេត្រូវធ្វើតាមរបៀបដូចគ្នា ប៉ុន្ដែត្រូវធ្វើនៅកន្លែងឆ្ងាយបន្ដិច ហើយការប្រមូលផល និងទុកដាក់ត្រូវធ្វើដោយឡែកពីគ្នា ។
គួរចងចាំៈ គេធ្វើការសម្រិតសម្រាំងពូជណាដែលមានផលខ្ពស់ គុណភាពអង្ករល្អ និងមានទីផ្សារ ។ បច្ចុប្បន្នមានក្រុមហ៊ុនមួយចំនួនកំពុងផលិតពូជស្រូវសុទ្ធល្អដែលកសិករអាចរកជាវបានស្ទើរនៅគ្រប់ខេត្ត ។ កសិករត្រូវតែប្ដូរ ឬសម្រិតសម្រាំងពូជស្រូវរបស់ខ្លួនរៀងរាល់បីឬបួនឆ្នាំម្ដង ពីព្រោះពូជគឺជាកត្តាចម្បងក្នុងការកំណត់ទិន្នផលច្រើន ឬតិច ៕
