ពង្រឹងសមាគមម៉ាស៊ីនកិនស្រូវទាំង៩ខេត្ដដើម្បីនាំអង្ករចេញ
ទិដ្ឋភាពប្រតិភូចូលទៅពិនិត្យឃ្លាំងអង្ករដ៏ធំមួយកន្លែងនៅខេត្ដបាត់ដំបង
កាលពីរសៀលថ្ងៃទី៣០ ខែសីហា ឆ្នាំ២០០៩ គណៈប្រតិភូដឹកនាំដោយឯកឧត្ដមឧបនាយករដ្ឋមន្ដ្រី គាត ឈន់ រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុបានចុះត្រួតពិនិត្យ និងសំណេះសំណាលជាមួយបុគ្គលិកក្រុមហ៊ុនបៃតងកម្ពុជា ព្រមទាំងអាជីវករម៉ាស៊ីនកិនស្រូវ និងក្រុមប្រឹក្សាឃុំដែលជាសហគមន៍ និងសមាគមម៉ាស៊ីនកិនស្រូវចំនួន៩ខេត្ដ តាមព្រំដែនថៃ និងវៀតណាម អំពីការនាំស្រូវចេញ និងការផលិតឱ្យត្រឹមត្រូវតាមស្ដង់ដាអន្ដរជាតិ ។ ពិធីសំណេះសំណាលបានធ្វើឡើងនៅក្នុងបរិវេណឃ្លាំងស្រូវ និងពោតរបស់ក្រុមហ៊ុនបៃតងកម្ពុជា ស្ថិតក្នុងឃុំអូរចារ ក្រុងបាត់ដំបង ដោយមានការចូលរួមពីឯកឧត្ដមឧត្ដមសេនីយ៍ ក្វាន់ ស៊ាម មេបញ្ជាការកងវិស្វកម្ម ឯកឧត្ដមរដ្ឋលេខាធិការ អូន ព័ន្ធមុនីរ័ត្ន ឯកឧត្ដមរដ្ឋលេខាធិការ ជា ប៉េងឈាង ឯកឧត្ដម ស៊ុន គន្ធរ និងមន្ដ្រីក្រសួងសេដ្ឋកិច្ច និងហិរញ្ញវត្ថុ ។
លោកឧកញ៉ា ភួ ពុយ ប្រធានសភាពាណិជ្ជកម្មខេត្ដបាត់ដំបង និងជាប្រធានក្រុមហ៊ុនបៃតងកម្ពុជា បានធ្វើរបាយការណ៍អំពីសកម្មភាពក្រុមហ៊ុនបៃតងកម្ពុជាឱ្យដឹងថា ក្រុមហ៊ុនបានចុះជាប់ជាមួយកសិកររយៈពេល២-៣ឆ្នាំកន្លងមកនេះ ឃើញថាទទួលបានលទ្ធផលល្អទាំងជីវភាពរស់នៅ ទាំងផលិតផល ហើយក្រុមហ៊ុនបានជម្រុញដល់មូលដ្ឋានក្នុងស្រុកថ្មគោល ស្រុកបាណន់ ស្រុកឯកភ្នំ និងតំបន់ផ្សេងៗទៀត ឱ្យប្រជាកសិករអនុវត្ដទទួលបានលទ្ធផលល្អៗដូចគ្នានៅទូទាំងប្រទេសកម្ពុជា ។ លោកឧកញ៉ាបានបញ្ជាក់ថា ដោយសារមានប្រាក់កម្ចីឥណទានដែលក្រសួងសេដ្ឋកិច្ច និងហិរញ្ញវត្ថុបានជួយដល់ប្រជាកសិករ ក្រុមហ៊ុនបៃតងបានអនុវត្ដប្រាក់ឥណទាននេះ ដោយទទួលបានក្នុងឆ្នាំ២០០៥ពីក្រសួងសេដ្ឋកិច្ចហិរញ្ញវត្ថុចំនួន២លានដុល្លារ ហើយប្រមូលទិញស្រូវបាន៩.៥០០តោន ក្នុងឆ្នាំ២០០៦ ទទួលបានប្រាក់ចំនួន៤លានដុល្លារ ប្រមូលទិញស្រូវបាន១៩.៥០០តោន ឆ្នាំ២០០៧ ទទួលបានប្រាក់ចំនួន៦លានដុល្លារ ប្រមូលទិញស្រូវបាន២៨.៥០០តោន ឆ្នាំ២០០៨ ទទួលបានប្រាក់១៥លានដុល្លារ ប្រមូលទិញស្រូវបាន៧១.៤០០តោន ហើយក្នុងឆ្នាំ២០០៩ ទទួលបានប្រាក់ជាង១៣លានដុល្លារ កំពុងផ្ដល់ឥណទានឱ្យកសិករដើម្បីពង្រីកកសិផលឱ្យកាន់តែកើនឡើងថែមទៀត តាមកម្រិតស្ដង់ដាអន្ដរជាតិសម្រាប់នាំចេញទៅក្រៅប្រទេស ។ លោកឧកញ៉ាបានបន្ដទៀតថា កន្លងមករោងម៉ាស៊ីនកិនស្រូវចំនួន៣២០ត្រូវការប្រាក់កម្ចី ហើយបានផ្ដល់ឱ្យបានចំនួន១៣៥រោងម៉ាស៊ីន ដោយមានអត្រាការប្រាក់ទាប ត្រូវបង់ឱ្យទៅធនាគារតាមឯកសារដែលអាចផ្ដល់ប្រាក់កម្ចីឱ្យបាន ព្រោះរោងម៉ាស៊ីនកិនស្រូវទាំងអស់បានរួមគ្នាបង្កើតជាសមាគមសម្រាប់ប្រមូលផលស្រូវ ។
លោកឧកញ៉ាបានរៀបរាប់អំពីសកម្មភាពផ្ដល់ឥណទានដល់កសិករដើម្បីកែប្រែការប្រើប្រាស់ពូជស្រូវ បច្ចេកទេសដាំដុះដែលអាចធ្វើបាន២ដងក្នុងមួយឆ្នាំ ស្ដារពង្រីកប្រព័ន្ធប្រឡាយ ផ្លូវលំចុះទៅដល់ស្រែរបស់ប្រជាកសិករ បង្កើតទីផ្សារសម្រាប់ទិញផលិតផលរបស់កសិករ និងបង្កើតផ្សារលក់គ្រឿងឧបភោគ បរិភោគ ឱ្យកសិករក្នុងសហគមន៍ដោយមានតម្លៃទាប ។ ថ្មីៗនេះ ផលិតផលពោតដែលត្រូវនាំចេញទៅប្រទេសថៃត្រូវបានថៃផ្អាកទិញ ដោយទម្លាក់ថ្លៃទាបមកនៅត្រឹមជាង២បាត ឬ៣បាតក្នុង១គីឡូក្រាម តែក្រុមហ៊ុនបៃតងទទួលទិញគ្រាប់ពោតពីកសិករដែលចេញទៅថៃមិនរួចនោះបានប្រហែល៣អាទិត្យប៉ុណ្ណោះ តម្លៃពោតបានឡើងដល់៤,៨បាត ក្នុង១គីឡូក្រាម ហើយក៏មានឈ្មួញថៃមកដណ្ដើមទិញផងដែរ នៅប៉ែកខាងលិចខេត្ដបាត់ដំបង មានស្រុកកំរៀង ស្រុកភ្នំព្រឹក និងស្រុកសំពៅលូន ។
ទោះបីជាយ៉ាងណា លោកឧកញ៉ាក៏បានសំណូមពរផងដែរទៅដល់សមត្ថកិច្ច និងក្រសួងពាក់ព័ន្ធខាងកម្ពុជា សុំពិនិត្យមើលទំនិញដែលត្រូវនាំចេញ និងនាំចូលតាមប្រព័ន្ធច្បាប់ថា តើត្រូវឱ្យផលិតផលបរទេសបែបណានាំចូល ដើម្បីកុំឱ្យសិប្បកម្មខ្នាតតូចក្នុងស្រុកដួលរំលំ ដោយសារផលិតផលពីក្រៅមកជ្រៀតជ្រែក ហើយបើកឱ្យទូលំទូលាយតាមច្រកដែលនាំផលិតផលចេញជាផ្លូវការឱ្យមានភាពងាយស្រួល ។ ចំពោះប្រាក់កម្ចីឥណទានសុំបង្កើនបន្ថែម ព្រោះនៅមានកសិករច្រើនទៀតតាមតំបន់ផ្សេងត្រូវការដូចគ្នា ហើយសុំឱ្យការផ្ដល់ឥណទានដល់កសិករនេះមានរយៈពេលវែង ដើម្បីឱ្យកសិករយកថវិកាទៅទិញឧបករណ៍ប្រើប្រាស់លើវិស័យកសិកម្មបែបទាន់សម័យ ព្រោះកន្លងមកពួកគាត់ធ្វើតាមបែបបុរាណបន្សល់ទុកតាំងពីពេលមុនៗមក ។ ឯប្រាក់កម្ចីសុំឱ្យខាងធនាគារផ្ដល់ឱ្យមកទាន់ពេលដែលកសិករត្រូវការចំពេលកំពុងធ្វើស្រែត្រូវការទុន ព្រោះកន្លងមកតែងតែឱ្យនៅពេលដែលកសិករកំពុងប្រមូលផល ម្ល៉ោះហើយទុនគាត់មានរួចស្រេចដែលបានពីការលក់ផលិតផលរបស់គាត់ ។
តំណាងសមាគមម៉ាស៊ីនកិនស្រូវ៩ខេត្ដជាប់ព្រំប្រទល់ថៃ និងវៀតណាមរបស់ប្រទេសកម្ពុជា ក៏សុំឱ្យជួយសម្រួលដល់សមាគមផ្សេងៗទៀតឱ្យមានគោលការណ៍អនុវត្ដបានដូចសមាគមក្នុងខេត្ដបាត់ដំបងដែរ ដែលមើលទៅឃើញមានការរីកចម្រើនយ៉ាងខ្លាំងក្នុងឆ្នាំនេះអំពីផលិតផលស្រូវ ។ លោក យូ សឿម ក្រុមប្រឹក្សាឃុំរូងជ្រៃ ស្រុកថ្មគោល ខេត្ដបាត់ដំបង ព្រមទាំងឃុំចំនួន៥ទៀតក្នុងខេត្ដពោធិ៍សាត់ សុំឱ្យក្រុមហ៊ុនបៃតងកម្ពុជាជម្រុញបន្ថែមរាល់សកម្មភាពទៅដល់កន្លែងផ្សេងៗទៀត ព្រោះទិន្នផលឡើងខ្ពស់ក្នុងមួយហិកតាអាចទទួលបានស្រូវពី៥ទៅ៦តោន ហើយពូជស្រូវសុទ្ធល្អក្រអូបអាចធ្វើបាន២ដងក្នុង១ឆ្នាំ ។
ឯកឧត្ដមឧបនាយករដ្ឋមន្ដ្រី គាត ឈន់ បានបញ្ជាក់ថា ពិតជាប្លែកមែនពេលមកដល់ខេត្ដបាត់ដំបង គឺមើលទៅបៃតងភាវូបនីយកម្មធ្វើឱ្យនឹកឃើញកាលពីសម័យមុនៗដែលការរីកចម្រើននេះហួសពីការស្មានគូបផ្សំរាជរដ្ឋាភិបាលកម្ពុជាកំពុងជម្រុញផ្លូវគមនាគមន៍សំខាន់ៗតាមខ្សែបន្ទាត់ព្រំដែនផងនោះ ធ្វើឱ្យប្រជាកសិករកាន់តែធូរស្រាលឡើង ។ ឯកឧត្ដមនឹងពិនិត្យឡើងវិញនូវច្រកនាំចេញចូលជាផ្លូវការ ហើយកែសម្រួលរាល់ប្រាក់កម្ចីឱ្យកាន់តែមានភាពងាយស្រួលទៀតដល់កសិករដែលមានឯកឧត្ដម ស៊ុន គន្ធរ ជាអ្នកចុះផ្ទាល់ដល់សមរភូមិ ។ ឯកឧត្ដម គាត ឈន់ បានបន្ដទៀតថា គំរោងរបស់ឯកឧត្ដមត្រូវទៅពិនិត្យមើលតំបន់រ៉ែមាសនៅបន្ទាយមានជ័យ និងប្រព័ន្ធផ្លូវសំខាន់ៗតាមបណ្ដោយព្រំដែនដែលមានឥណទានបានត្រៀមរួចរាល់អស់ហើយទាំងទំនប់វារីអគ្គិសនី និងផ្លូវក្រាលកៅស៊ូមួយចំនួនទៀតចេញពីខេត្ដបាត់ដំបងឆ្ពោះទៅព្រំប្រទល់ដែន ។
លោកឧកញ៉ា ភួ ពុយ បានបញ្ជាក់ថា ក្នុងឆ្នាំ២០១០ខាងមុខនេះ វៀតណាមនឹងត្រូវនាំអង្ករពីកម្ពុជាប្រមាណមួយលានតោន សម្រាប់នាំចេញទៅសហគមន៍អឺរ៉ុបដោយរួចពន្ធ ហើយក៏មានក្រុមហ៊ុនផ្សេងៗមកសុំបើករោងម៉ាស៊ីននៅស្រុកខ្មែរដែរ ។ ត្រង់នេះយើងគួរតែប្រយ័ត្ន ជួនកាលមានក្រុមហ៊ុនខ្លះមកធ្វើនំអត់ម្សៅ ព្រោះកម្ពុជាអាចងើបឈរដោយខ្លួនឯងបានទាំងការផលិតទាំងការនាំចេញ ដូច្នេះសុំឱ្យរាជរដ្ឋាភិបាលជួយពិនិត្យសម្រេចបានហ្មត់ចត់ ៕
សារព័ត៌មានកោះសន្ដិភាព, ថ្ងៃទី២ ខែកញ្ញា ឆ្នាំ២០០៩
