ការបង្កើតសមាគមនាំអង្ករចេញកំពុងក្លាយជាការពិត
ស្រូវ និងអង្ករផ្ការំដួលរបស់ខ្មែរ
អាជ្ញាធរសៀមបានស្នើឱ្យកម្ពុជាបង្កើតសមាគមនាំអង្ករចេញរួមគ្នា និងចាត់ទុកថាជាការកំណត់ថ្លៃលក់ និងបង្កើនការលក់អង្ករចេញជាអន្ដរជាតិ ដោយមានប្រទេសវៀតណាម ឡាវ និងភូមាចូលរួមផងដែរ ។ ការបង្កើតសមាគមនាំអង្ករចេញនេះ សម្ដេចអគ្គមហាសេនាបតីតេជោ ហ៊ុន សែន បានផ្ដល់អនុសាសន៍រួចមកហើយឱ្យប្រទេសដែលនាំអង្ករចេញគួរតែបង្កើតសមាគមនាំអង្ករចេញ ដូចអង្គការ OPEC នាំប្រេងចេញដូច្នោះដែរ ។ ពេលនេះការស្នើរបស់សម្ដេចនាយករដ្ឋមន្ដ្រីកាលពីប៉ុន្មានឆ្នាំមុន កំពុងក្លាយជាការពិត ដែលពេលនោះប្រជាកសិករមិនចាំបាច់ដឹកស្រូវទៅលក់ឱ្យប្រទេសជិតខាងទៀតទេ ព្រោះការវិនិយោគពិតជានឹងកើតមានឡើង ។
កាលពីថ្ងៃទី១៤ ខែសីហា ឆ្នាំ២០០៩ លោកស្រី ផន ធីវ៉ាណាខាសាយ រដ្ឋមន្ដ្រីក្រសួងពាណិជ្ជកម្មសៀម បានថ្លែងពីការពិភាក្សាទ្វេភាគីជាមួយកម្ពុជាក្នុងអំឡុងពេលនៃកិច្ចប្រជុំរដ្ឋមន្ដ្រីសេដ្ឋកិច្ចអាស៊ាន (AEM) លើកទី៤១ក្នុងទីក្រុងបាងកកថា សៀមបានស្នើឱ្យរៀបចំបង្កើតសមាគមនាំចេញអង្កររួមគ្នាក្នុងក្រុមប្រទេសតាមដងទន្លេ អ៊ីរ៉ាវ៉ាឌី-ចៅប្រាយ៉ា-មេគង្គ ឬ ACMECS ដែលមានប្រទេសសៀម វៀតណាម កម្ពុជា ឡាវ និងភូមា សម្រាប់រក្សាស្ថិរភាពតម្លៃអង្ករ ។ នៅក្នុងការពិភាក្សាលើកនេះ ក៏បានដាក់យុទ្ធសាស្ដ្រក្នុងនាមប្រទេសនាំចេញអង្ករពិភពលោក ដោយប្រគល់ឱ្យមន្ដ្រីនៃប្រទេសនីមួយៗធ្វើការចរចា និងដំណើរការដោយផ្នែកឯកជន មានរដ្ឋផ្ដល់ការទ្រទ្រង់ ដែលអាចដំណើរការបាននៅក្នុងឆ្នាំ២០១០ ។
ចំណែកលោក ឈូគៀត អូផាសាវុង នាយកសមាគមនាំអង្ករចេញរបស់សៀម បានឱ្យដឹងថា គោលជំហរខាងលើមានស្ថានភាពល្អប្រសើរ ប៉ុន្ដែការប្រតិបត្ដិប្រហែលដំណើរការយ៉ាងពិបាក និងមិនអាចកើតឡើងបានព្រោះពាណិជ្ជកម្មអង្ករមានការកំណត់លើការគ្រប់គ្រង រួមទាំងការនាំចេញអង្ករមានឯករាជ្យ និងមានការប្រកួតប្រជែងខ្ពស់ ។ ប្រសិនបើមានដំណើរការអាចខុសនឹងគោលការណ៍ពាណិជ្ជកម្មសេរី ឬបើសិនជាមានការបញ្ជាឱ្យនាំចេញស្របទៅតាមប្រព័ន្ធដែលរដ្ឋកំណត់ អាចធ្វើឱ្យមានភាពច្របូកច្របល់ ។
ទោះបីជាបែបណា វិធីរៀបចំឱ្យសមាគមនេះដំណើរការគឺជាគោលដៅហើយ ។ បច្ចុប្បន្នប្រទេសសៀម និងវៀតណាម បានប្រកួតប្រជែងគ្នាក្នុងការនាំអង្ករចេញ តែសូមកុំភ្លេចថា ប្រទេសទាំង២នេះក៏ជាប្រទេសដែលទិញអង្ករពីកម្ពុជាដែរ ។
សារព័ត៌មានកោះសន្ដិភាព, ថ្ងៃទី១៧ ខែសីហា ឆ្នាំ២០០៩
រូបភាពកណ្ដាប់ស្រូវ និងអង្ករដែលជាកសិផលរបស់កសិករនៅតំបន់អាស៊ីអាគ្នេយ៍
