មនុស្សល្បីៗលំដាប់ពិភពលោកនឹងចូលមកកម្ពុជា
មនុស្សល្បីៗលំដាប់ពិភពលោក ៩ នាក់ នឹងចូលមកកម្ពុជាម្នាក់ម្ដង ពីខែវិច្ឆិកា ឆ្នាំ២០០៩ ដល់ខែមេសា ឆ្នាំ២០១០
អង្គការមូលនិធិសន្ដិភាពអន្ដរជាតិ (International Peace Foundation) ដែលមានទីស្នាក់ការធំនៅរដ្ឋធានីវីយ៉េន នៃប្រទេសអូទ្រីស បានចាត់ចែងគម្រោងមួយរៀបចំការបណ្ដាក់គ្នាចូលមកកម្ពុជានៃឥស្សរជនល្បីឈ្មោះលំដាប់ពិភពលោក៩នាក់តាមការស្នើអញ្ជើញរបស់ព្រះមហាក្សត្រខ្មែរ និងមេដឹកនាំកម្ពុជា ។ លោក Uwe Morawetz ដែលជានាយកប្រតិបត្ដិរបស់អង្គការមូលនិធិសន្ដិភាពអន្ដរជាតិ គឺជាអ្នករៀបចំគម្រោងនេះដែលដាក់ឈ្មោះថា «ស្ពានភ្ជាប់ប្រទេសអាស៊ាន (ASEAN Bridges)» ជាផ្នែកមួយនៃកិច្ចប្រឹងប្រែងដើម្បីជួយផ្សព្វផ្សាយប្រទេសកម្ពុជាឱ្យពិភពលោកស្គាល់ ជាជាងការដែលមនុស្សលើផែនដីនេះស្គាល់ស្រុកខ្មែរត្រឹមតែដោយសារប្រាសាទអង្គរវត្ដ និងរបបខ្មែរក្រហមប៉ុល ពត នោះ ។
នាយករបស់អង្គការនេះបានថ្លែងថា នេះគឺជាឱកាសល្អសម្រាប់ប្រទេសកម្ពុជាដែលនឹងក្លាយជាឱកាសនៃការបានទទួលជួបពិភាក្សាជាមួយមនុស្សល្បីៗក្នុងពិភពលោក ក្នុងដំណើរនៃការសិក្សាផ្ដល់យោបល់មតិរវាងគ្នា រុញប្រទេសកម្ពុជាឆ្ពោះទៅរកសន្ដិភាព ។
តាមសេចក្ដីអធិប្បាយរបស់ប្រធាននៃអង្គការមូលនិធិសន្ដិភាពអន្ដរជាតិលោក Uwe Morawetz នេះ ឥស្សរជនទាំង៩នាក់ដែលនឹងចូលមកកម្ពុជាម្នាក់ម្ដងៗចាប់ពីខែវិច្ឆិកា ឆ្នាំ២០០៩ រហូតដល់ខែមេសាឆ្នាំ២០១០ មានទាំងសិល្បៈករលំដាប់ពិភពលោក និងជ័យលាភីពានរង្វាន់ណូបែលនៃវិស័យនានាចំនួន៩នាក់ ។ ឈ្មោះរបស់មនុស្សល្បីៗពេញពិភពលោកនេះ ត្រូវបានលើករាប់ ដូចជា ៖
- លោក Aaron Ciechanover ម្ចាស់ពានរង្វាន់ណូបែលផ្នែកគីមីឆ្នាំ២០០៤
- លោក Jackie Chan ហៅ ឈិនឡុង តារាភាពយន្ដហុងកុងដ៏ល្បីល្បាញ
- លោក Oliver Stone អ្នកដឹកនាំផលិតខ្សែភាពយន្ដ
- លោកសាស្ដ្រាចារ្យ David Gross អ្នករូបវិទ្យាជ័យលាភីណូបែលឆ្នាំ២០០៤
- លោកសាស្ដ្រាចារ្យ Eric Maskin ជ័យលាភីពានរង្វាន់ណូបែលសេដ្ឋកិច្ចឆ្នាំ២០០៧
- លោក Torsten Wiesel អ្នកបានពានរង្វាន់ណូបែលពិភពលោកផ្នែកវិទ្យាសាស្ដ្រឆ្នាំ១៩៨១
- លោក Vladimir Ashkenazy ជាសិល្បៈករខាងកូតវីយូឡុងដ៏ល្បីល្បាញបំផុតម្នាក់របស់ពិភពលោក
- អ្នកស្រី Francoise Barre-Sinoussi ជ័យលាភីរង្វាន់ណូបែលពិភពលោកផ្នែកវេជ្ជសាស្ដ្រឆ្នាំ២០០៨
- លោកបណ្ឌិត Jose Ramos-Horta ប្រធានាធិបតីនៃប្រទេសកោះទីម័រខាងកើតដែលជាជ័យលាភីពានរង្វាន់ណូបែលសន្ដិភាពម្នាក់ដែរនោះ ។
ឥស្សរជនល្បីល្បាញក្នុងពិភពលោកទាំង៩នាក់គ្រោងនឹងចូលមកកម្ពុជា ហើយចូលគាល់ព្រះករុណាព្រះមហាក្សត្រ ក៏ដូចជាជួបមេដឹកនាំប្រទេសដទៃទៀត ទាំងមន្ដ្រីជាន់ខ្ពស់កម្ពុជា រួមទាំងអ្នកស្រាវជ្រាវទាំងឡាយនៃសាកលវិទ្យាល័យនានាផងដែរ ។ ពិតមែនតែឥស្សរជនល្បីល្បាញក្នុងពិភពលោកទាំង៩នាក់ខ្លះធ្លាប់បានចូលមកកម្ពុជា មានដូចជា តារាភាពយន្ដហុងកុងហូលីវូដ លោក ចាក់គី ចាង ហៅ ឈីនឡុង នោះក៏ដោយ ក៏កម្មវិធីនេះគឺជាការរៀបចំលើកទីមួយដែលនឹងមានធ្វើឡើងនៅក្នុងព្រះរាជាណាចក្រកម្ពុជាក្រោមការកោះអញ្ជើញរបស់ព្រះមហាក្សត្រ និងមេដឹកនាំកម្ពុជា ។
ក្រុមអ្នករៀបចំផ្ដល់សេចក្ដីសង្ឃឹមថា ពិធីនេះនឹងក្លាយជាព្រឹត្ដិការណ៍ដែលទាក់ទាញការយកចិត្ដទុកដាក់របស់សហគមន៍អន្ដរជាតិ និងពិភពលោកចំពោះប្រទេសកម្ពុជា ។ ជាពិសេសទាំងជាឱកាសសម្រាប់វិស័យនៃការអប់រំដែលជាគ្រឹះមូលដ្ឋានរុញដំណើរប្រទេសកម្ពុជាទៅរកអនាគតឲ្យប្រសើរឡើង តាមរយៈការរៀនសូត្ររបស់យុវជនក្មេងជំនាន់ក្រោយនៅកម្ពុជា ។
លោក Uwe Morawetz បានអធិប្បាយក្នុងនាមជាម្ចាស់អ្នករៀបចំគម្រោងនេះថា កម្មវិធីដែលឥស្សរជនលំដាប់ពិភពលោកចូលមកកម្ពុជា ក៏មានគោលដៅសម្រាប់បំផុសគំនិតមនុស្សក្មេងៗក្នុងប្រទេសកម្ពុជាដើម្បីអនាគតរបស់ប្រទេសតាមរយៈការផ្ដល់យោបល់ និងការពិគ្រោះមតិគ្នាជាមួយឥស្សរជនលំដាប់ពិភពលោក ទាំងជ័យលាភីពានរង្វាន់ណូបែលទាំងឡាយដែលមិនបានមកកម្ពុជាពីលើកមុនៗ ។ អ្វីជាសេចក្ដីសង្ឃឹមដ៏មុតមាំនោះ គឺព្រឹត្ដិការណ៍ទាំងនេះនឹងក្លាយជាកម្លាំងអូសទាញប្រទេសកម្ពុជាពីការមិនសូវស្គាល់នៅលើពិភពលោកឱ្យមានសម្លេងរបស់ខ្មែរទៅក្នុងលំដាប់ពិភពលោកដើម្បីមានកេរ្ដិ៍ឈ្មោះទូលំទូលាយខុសពីការដែលគេធ្លាប់ស្គាល់កម្ពុជាត្រឹមតែដោយសាររបបដ៏មហាឧក្រិដ្ឋនៃពួកខ្មែរក្រហម និងប្រាសាទអង្គរវត្ដកេរ្ដិ៍តំណែលដូនតាខ្មែរនោះ ។
ចាប់ពីឆ្នាំ១៩៨៩មក អង្គការមូលនិធិសន្ដិភាពអន្ដរជាតិបានរៀបចំកម្មវិធីចំនួន៧០០នៅតាមបណ្ដាប្រទេសនានានៃសហភាពអឺរ៉ុប ដោយផ្ដោតជាសំខាន់លើមូលដ្ឋាននៃការអប់រំដែលជាគន្លឹះនៃសន្ដិភាព ។ ប្រទេសសៀមធ្លាប់បានសុំឱ្យមានការរៀបចំកម្មវិធីនេះនៅទឹកដីរបស់ខ្លួនក្នុងឆ្នាំ២០០៣ដែរ ។ ស្ពានភ្ជាប់ប្រទេសអាស៊ានត្រូវបានរៀបចំឡើង៣លើកមកហើយ ៖
- លើកទី១ នៅប្រទេសហ្វីលីពីន ក្នុងឆ្នាំ២០០៣
- លើកទី២ នៅប្រទេសម៉ាឡេស៊ី ក្នុងឆ្នាំ២០០៨
- លើកទី៣ ក្នុងប្រទេសកម្ពុជាឆ្នាំ២០០៩នេះ ។
ប្រទេសបន្ដបន្ទាប់មកទៀតជាទិសដៅនៃកម្មវិធីនេះមានប្រទេសវៀតណាម សឹង្ហបូរី ឥណ្ឌូណេស៊ី លាវ និងភូមា ៕
លោក Aaron Ciechanover ម្ចាស់ពានរង្វាន់ណូបែលផ្នែកគីមីឆ្នាំ២០០៤
លោក Jackie Chan ហៅ ឈិនឡុង តារាភាពយន្ដហុងកុងដ៏ល្បីល្បាញ
លោក Oliver Stone អ្នកដឹកនាំផលិតខ្សែភាពយន្ដ
លោកសាស្ដ្រាចារ្យ David Gross អ្នករូបវិទ្យាជ័យលាភីណូបែលឆ្នាំ២០០៤
លោកសាស្ដ្រាចារ្យ Eric Maskin ជ័យលាភីពានរង្វាន់ណូបែលសេដ្ឋកិច្ចឆ្នាំ២០០៧
លោក Torsten Wiesel អ្នកបានពានរង្វាន់ណូបែលពិភពលោកផ្នែកវិទ្យាសាស្ដ្រឆ្នាំ១៩៨១
លោក Vladimir Ashkenazy ជាសិល្បៈករខាងកូតវីយូឡុងដ៏ល្បីល្បាញបំផុតម្នាក់របស់ពិភពលោក
អ្នកស្រី Francoise Barre-Sinoussi ជ័យលាភីរង្វាន់ណូបែលពិភពលោកផ្នែកវេជ្ជសាស្ដ្រឆ្នាំ២០០៨
លោកបណ្ឌិត Jose Ramos-Horta ប្រធានាធិបតីនៃប្រទេសកោះទីម័រខាងកើត ជាជ័យលាភីពានរង្វាន់ណូបែលសន្ដិភាព
