សៀមរុញគុយទាវលក់មកដល់រាជធានីភ្នំពេញ
ធុងគុយទាវសៀមច្រឡំកន្លែងលក់ ត្រូវអាជ្ញាធរខណ្ឌឫស្សីកែវចាប់ឃាត់
រទេះធុងគុយទាវមានយីហោជាអក្សរសៀមសុទ្ធសាធ មិនមានលក្ខណៈជាខ្មែរ ត្រូវបានអាជ្ញាធរខណ្ឌឫស្សីកែវ ចាប់រឹបអូសកាលពីវេលាម៉ោង១០ព្រឹក ថ្ងៃទី៣១ ខែមីនា ឆ្នាំ២០០៩ នៅតាមផ្លូវជាតិលេខ៥ ក្នុងភូមិសាមគ្គី សង្កាត់ឫស្សីកែវ ខណ្ឌឫស្សីកែវ ហើយនាំទៅកាន់សាលាខណ្ឌឫស្សីកែវដើម្បីសាកសួរ ។
ការសរសេរស្លាកយីហោជាអក្សរបរទេសនេះ បានធ្វើឱ្យប៉ះពាល់យ៉ាងធ្ងន់ធ្ងរដល់អត្ដសញ្ញាណជាតិខ្មែរ ដែលស្លាកយីហោធុងគុយទាវនេះ ត្រូវបានគេយកមករុញលក់គុយទាវនៅកណ្ដាលរាជធានីភ្នំពេញដែលជាបេះដូងនៃព្រះរាជាណាចក្រកម្ពុជា ។
តាមអាជ្ញាធរខណ្ឌឫស្សីកែវបានឱ្យដឹងថា ធុងគុយទាវនេះ ត្រូវបានជនជាតិសៀមយកមកដាក់តាំងលក់នៅមុខផ្ទះលេខ11A ផ្លូវជាតិលេខ៥ ភូមិសាមគ្គី ខណ្ឌឫស្សីកែវ រយៈពេល២ទៅ៣ថ្ងៃមកហើយ ។ ធុងគុយទាវនេះ មិនមានលក្ខណៈជាខ្មែរសោះ នៅលើស្លាកយីហោមិនមានអក្សរខ្មែរ១តួនោះទេ គឺសុទ្ធតែជាអក្សរសៀម ជាហេតុធ្វើឱ្យមានការប៉ះពាល់ និងបាត់បង់នូវអត្ដសញ្ញាណខ្មែរ ទើបអាជ្ញាធរខណ្ឌឫស្សីកែវ ដោយមានការណែនាំពីលោកឃ្លាំង ហួត អភិបាលខណ្ឌ និង លោកនុត ណុនដារ៉ា អភិបាលរងខណ្ឌ បញ្ជាឱ្យរៀបចំសណ្ដាប់ធ្នាប់ខណ្ឌ ចុះទៅចាប់រឹបអូសយកមកទុកនៅសាលាខណ្ឌ ។
លោកនុត ណុនដារ៉ា អភិបាលរងខណ្ឌឫស្សីកែវ បានឱ្យដឹងថា ការសរសេរស្លាកយីហោនៅលើធុងគុយទាវជាអក្សរសៀម ហើយរុញលក់នៅកណ្ដាលរាជធានីភ្នំពេញបែបនេះ បានធ្វើឱ្យប៉ះពាល់យ៉ាងខ្លាំងដល់អត្ដសញ្ញាណជាតិខ្មែរ ។ នៅក្នុងការចាប់ដកហូតធុងគុយទាវនេះ សាលាខណ្ឌឫស្សីកែវបានឃាត់ទុកសិន រង់ចាំគោលការណ៍ពីឯកឧត្ដម កែប ជុតិមា អភិបាលរាជធានីភ្នំពេញ ។ ប្រជាពលរដ្ឋនៅទីនោះនាំគ្នានិយាយថា ការសរសេរស្លាកយីហោ ដែលពុំមានលក្ខណៈជាខ្មែរមិនត្រូវឱ្យមានទេ ធ្វើបែបនេះដូចមើលងាយខ្មែរម្ចាស់ស្រុក ។ ការសរសេរស្លាកត្រូវទាមទារឱ្យមានច្បាប់អនុញ្ញាតឱ្យបានត្រឹមត្រូវ និងមានលក្ខណៈជាខ្មែរ ។
តាមប៉ូលិសមូលដ្ឋានបានឱ្យដឹងថា ធុងគុយទាវនេះ មានម្ចាស់ឈ្មោះនីលក្លាង ដកមាយ ភេទស្រី អាយុ៤០ឆ្នាំ ជាជនជាតិសៀម មានប្ដីជាជនជាតិសៀម បម្រើការងារនៅស្ថានីយ៍ទូរទស្សន៍ប៉ុស្ដិ៍លេខ៥ ។ ធុងគុយទាវនោះ ត្រូវបានបុរសជាប្ដីទិញពីជនជាតិសៀម ដែលបានចូលរួមលក់មី គុយទាវ នៅក្នុងឱកាសតាំងពិព័រណ៍ពាណិជ្ជកម្មនៅមជ្ឈមណ្ឌលម៉ុងឌីយ៉ាល់ ក្នុងតម្លៃប្រមាណជាង១០០ដុល្លារ នៅពេលដែលជនជាតិសៀមចូលរួមតាំងពិព័រណ៍នោះត្រឡប់ទៅស្រុកវិញ ។
តាមព័ត៌មានឱ្យដឹងទៀតថា ការទិញធុងគុយទាវដើម្បីឱ្យប្រពន្ធជនជាតិសៀមលក់ មី គុយទាវនេះ គឺបុរសជាប្ដីបម្រុងយកធុងនោះទៅកែច្នៃឱ្យមានលក្ខណៈជាខ្មែរវិញដែរ តែប្រពន្ធប្រញាប់យកធុងចេញទៅលក់ពេក ក៏ត្រូវកម្លាំងសណ្ដាប់ធ្នាប់ខណ្ឌចុះទៅចាប់យកតែម្ដងទៅ ៕
ដកស្រង់ពីសារព័ត៌មានកោះសន្តិភាព ថ្ងៃទី០១ ខែមេសា ឆ្នាំ២០០៩
