ប្រាសាទបក្សីចាំក្រុងស្ថិតនៅកណ្ដាលព្រៃស្រោងខាងឆ្វេងផ្លូវ និងខាងជើងភ្នំបាខែង ប្រហែល១៥០ ម៉ែត្រ មានកាំជណ្ដើរស្ថាបនាដោយថ្មបាយក្រៀម និងឥដ្ឋពណ៌ក្រហម ។ នៅម្ដុំប្រាសាទនេះក៏មានប្រាសាទតូចៗមួយចំនួនទៀតកសាងអំពីឥដ្ឋ ដែលខ្លះបាំងបាត់ដោយរុក្ខជាតិ ដែលនៅឆៀងខាងជើង មានប្រាសាទពីរបី ដូចជា ប្រាសាទបាយក្អែក និងប្រាសាទបី ជាដើម ។
ប្រាសាទបក្សីចាំក្រុងមានកំពស់ ២៧ ម៉ែត្រ គិតពីបាតដល់កំពូល មានរាងជាសាជី មានថ្នាក់ៗ ធ្វើពីឥដ្ឋបែរមុខទៅទិសខាងកើត ។ ប្រាសាទនេះមាន ៤ ថ្នាក់ កសាងពីថ្មបាយក្រៀមបន្ដុប ប្រាសាទឥដ្ឋខាងលើ មានជណ្ដើរគ្រប់ទាំងបួនទិស ទ្វារបញ្ឆោតបីទិស តែក្បាច់រចនាសម្រាប់បិទពីក្រៅបាត់បង់អស់ហើយនៅសល់តែក្បាច់ផ្ដែរលើខ្លោងទ្វារនៅល្អ មានព្រះឥន្ទ្រគង់លើដំរីឰរាវ័ណ ឯចុងទាំងសងខាងមានគណេស និងមាត់ទ្វារខាងកើតមានសិលាចារឹក ។
តាមឯកសារបានបញ្ជាក់ថា កាលពីជំនាន់កសាងប្រាសាទនេះពុំមានសិលាចារឹកអ្វីឡើយ លុះដល់ព្រះបាទរាជេន្ទ្រវរ្ម័នទី២ (៩៤៤‑៩៦៨ គ.ស) នាំរាជធានីពីកោះកេរមកតាំងនៅអង្គរសាថ្មីវិញនៅគ្រិស្ដសករាជ ៩៤៨ ទើបព្រះអង្គឱ្យគេចារឹកកាព្យសំស្ក្រឹតនៅលើមេទ្វារគួរជាទីចាប់អារម្មណ៍ក្រៃលែង ព្រោះមាននិទានអំពីបុព្វការីជនដំបូងបង្អស់នៃជនជាតិខ្មែរក្នុងលំនាំរឿងព្រេងដែលបាននិយាយថា ខ្មែរមានតំណពូជពង្សមកពីឥសីមួយអង្គព្រះនាម “កម្ពុ” ដែលបង្កើតដោយឯកឯង (ស្វាយម្ភូ) ។ ឥសីនោះទៅភពប្រសព្វនឹងទេពកញ្ញាឈ្មោះ “មេរា” ទើបបង្កើតជាកូនចៅតរៀងមក ។ សិលាចារឹកក៏បានរៀបរាប់ដោយដឹងថា ព្រះបាទរាជេន្ទ្រវរ្ម័នទី២ បានសាងរូបព្រះឥសូរដោយមាសសុទ្ធ ដំកល់ទុកក្នុងប្រាសាទនេះ តែឥឡូវនេះ មិនឃើញរូបព្រះឥសូរនោះទេ ឃើញតែព្រះពុទ្ធរូបចូលនិព្វានវិញ ។ កាលពីដើមប្រាសាទបក្សីចាំក្រុងប្រហែលជាមានកំពែងព័ទ្ធជុំវិញ ព្រោះឃើញមានសំណល់ខ្លះ ។ ប្រាសាទបក្សីចាំក្រុងកសាងនៅលើស្ថានីយបុរេប្រវត្ដិមួយនៃយុគសំរឹទ្ធិ ៕
ប្រាសាទបក្សីចាំក្រុងមើលពីជាន់ទី៣ ពីទិសខាងត្បូងឆៀងខាងលិច
ទ្វារខាងកើតនៃប្រាសាទបក្សីចាំក្រុង
សិលាចារឹកនៅទ្វារខាងកើតប្រាសាទបក្សីចាំក្រុង
ឃ្លានៃសិលាចារឹកបក្សីចាំក្រុង ដែលបង្ហាញពីការភពប្រសព្វរវាងឥសី “ស្វាយម្ភូ” និងទេពអប្សរ “មេរា”
ពុទ្ធរូបចូលនិព្វាននៅក្នុងប្រាសាទបក្សីចាំក្រុង (ខែឧសភា ឆ្នាំ២០០៧) ពុំមានគ្រងជីវរ
ពុទ្ធរូបចូលនិព្វាននៅក្នុងប្រាសាទបក្សីចាំក្រុង (ខែកុម្ភៈ ឆ្នាំ២០០៩) មានគ្រងជីវរ និងគ្រឿងសក្ការៈ
បរិវេណមុខប្រាសាទបក្សីចាំក្រុង (ខាងកើត) បង្ហាញឲ្យឃើញក្រហូងដីដែលជាសំណល់នៃកំណាយស្ថានីយបុរេប្រវត្តិនៃយុគសំរឹទ្ធិ
រូបអប្សរានៅប្រាសាទបក្សីចាំក្រុងដែលរបេះក្បាច់រចនាបិទពីលើអស់ហើយ
ចម្លាក់នៅប្រាសាទបក្សីចាំក្រុង (ខែឧសភា ឆ្នាំ២០០៧)
ចម្លាក់នៅប្រាសាទបក្សីចាំក្រុង (ខែកុម្ភៈ ឆ្នាំ២០០៩)
ក្បាច់ផ្កាភ្ញីនៅលើទ្វារបញ្ឆោតប្រាសាទបក្សីចាំក្រុង
ក្បាច់ផ្កាភ្ញីនៅលើទ្វារបញ្ឆោតប្រាសាទបក្សីចាំក្រុង
ក្បាច់ផ្កាភ្ញីនៅលើសសរពេជ្រប្រាសាទបក្សីចាំក្រុង
ផ្នែកខាងក្រោមនៃទ្វារបញ្ឆោតប្រាសាទបក្សីចាំក្រុងដាច់បាក់បែកដោយសារវ័យចំណាស់ និងអាកាសធាតុ
ផ្នែកខាងក្រោមនៃសសរពេជ្រប្រាសាទបក្សីចាំក្រុងដាច់បាក់បែកដោយសារវ័យចំណាស់ និងអាកាសធាតុ
ក្បាច់ចម្លាក់ប្រាសាទបក្សីចាំក្រុងដាច់បាក់បែកដោយសារវ័យចំណាស់ និងអាកាសធាតុ
ក្បាច់ចម្លាក់ប្រាសាទបក្សីចាំក្រុងដាច់បាក់បែកដោយសារវ័យចំណាស់ និងអាកាសធាតុ
សំណល់ប្រាសាទបាយក្អែក ដែលបាក់បែកអស់ហើយ នៅសល់តែគ្រឹះ (ខឿន) ទ្វារប្រាសាទខាងកើត និងលិង្គព្រះឥសូរ
ក្បាច់ចម្លាក់នៅលើផ្ដែរប្រាសាទបាយក្អែក
លិង្គព្រះឥសូរនៅប្រាសាទបាយក្អែក ។ ពីទីនេះទៅ គេអាចមើលឃើញប្រាសាទបី ។
ប្រាសាទបី មើលពីទិសឥសាន
ទ្វារខាងកើតនៃប្រាង្គកណ្ដាលនៅប្រាសាទបី
យោនីនាងឧមាដំកល់នៅប្រាង្គកណ្ដាលនៃប្រាសាទបី
ទ្វារបញ្ឆោតនៅប្រាសាទបី
ក្បាច់ផ្កាភ្ញីនៅលើសសរពេជ្រនៅប្រាសាទបី
គ្រឹះ (ខឿន) នៃប្រាសាទ??? (មិនស្គាល់ឈ្មោះ) នៅខាងលិចប្រាសាទបី
បំណែកក្បាច់ផ្កាភ្ញីនៃប្រាសាទ???នៅខាងលិចប្រាសាទបី
បំណែកក្បាច់ផ្កាភ្ញីនៃប្រាសាទ???នៅខាងលិចប្រាសាទបី
បំណែករូបចម្លាក់នៃប្រាសាទ???នៅខាងលិចប្រាសាទបី
បំណែករូបចម្លាក់នៃប្រាសាទ???នៅខាងលិចប្រាសាទបី
