ចម្លាក់យក្ស និងទេវតានៅខ្លោងទ្វារអង្គរធំ
ខ្លោងទ្វារចូលអង្គរធំ ទិសខាងត្បូង
ចម្លាក់យក្ស និងទេវតាខ្លោងទ្វារអង្គរធំនៅតែមានអាថ៌កំបាំងសម្រាប់អ្នកសិក្សាពីបុរាណវិទ្យា
យោងតាមសៀវភៅមួយដែលមានចំណងជើងថា “ប្រវត្ដិសាស្ដ្រនៃកម្ពុជាសង្គមខ្មែរក្នុងរជ្ជកាលព្រះបាទជ័យវរ្ម័នទី៧” របស់លោកបណ្ឌិត មីសែលត្រាណេ ចាប់ពីបន្ទាត់ទី៧រាប់ពីលើចុះក្រោមក្នុងទំព័រទី៤៦រហូតដល់បន្ទាត់ទី២នៃទំព័រទី៤៩ បានសរសេររៀបរាប់់អំពីអត្ថន័យអាថ៌កំបាំងនៃទេវតា និងយក្សទាញព្រ័ត្រទាំងនោះថា វាជាតំណាងនូវឥន្ទធនូដែលភ្ជាប់ឋានមនុស្សលោកទៅនឹងឋានសួគ៌ ឬឋានទេវតា ។ មតិមួយទៀតថាជានិមិត្ដរូបនៃការកូរសមុទ្រទឹកដោះដែលជាទេវតាពាក់ព័ន្ធទៅនឹងការបង្កើតលោកយើងនេះ ។ ដូច្នេះហើយការតុបតែងខ្លោងទ្វារអង្គរធំដោយចម្លាក់យក្ស និងទេវតា មានន័យថាព្រះបាទជ័យវរ្ម័នទី៧ទ្រង់ចង់បង្ហាញនូវមហិទ្ធិឬទ្ធិរបស់ព្រះអង្គតែប៉ុណ្ណោះដែលបានឈ្នះលើទ័ពចាម ។
សូមបញ្ជាក់បន្ថែមថា តាមមតិលើកឡើងខាងលើនេះក៏ជាការមានប្រយោជន៍ដែរ ក៏ប៉ុន្ដែយកជាការពុំទាន់ត្រឹមត្រូវនៅឡើយទេ ព្រោះយើងយល់ពុំទាន់អស់សេចក្ដីត្រង់ថា ហេតុដូចម្ដេចបានជាយក្សមានចំនួនដល់ទៅ៥៤ រីឯទេវតាក៏មានចំនួនដូចគ្នាដែរ ? ដើម្បីឱ្យមានការបកស្រាយអត្ថន័យការបកស្រាយអត្ថន័យចម្បាំងរវាងយក្សនិងទេវតាខាងលើនេះឱ្យបានត្រឹមត្រូវ យើងត្រូវស្រាវជ្រាវរកចម្លើយតាមរយៈគម្ពីរទេវតាឥណ្ឌាដែលមានការអត្ថាធិប្បាយអំពីចម្បាំងរវាងយក្ស និងទេវតា ។
សូមបញ្ជាក់ថា ក្នុងជំនឿលើសភាវៈល្អ និងអាក្រក់នៃព្រហ្មញ្ញសាសនា យក្ស និងទេវតា គឺជាកម្លាំងផ្ទុយគ្នាក៏ពិតមែន ក៏ប៉ុន្ដែវាជាចំណុចចាប់ផ្ដើមនៃចលនាជុំវិញឱ្យមានការបង្កើតស្ថិរភាពក្នុងលោកយើងនេះដែលមានលក្ខណៈអមតៈក្នុងទស្សនៈរបស់ជនជាតិឥណ្ឌាបុរាណ ។ ម្យ៉ាងទៀតការអភិវឌ្ឍស្ថិរភាព និងសេដ្ឋកិច្ចនៃមនុស្សលោកយើងទាមទារជានិច្ចកាលនូវថាមពលទាំងពីរនេះដែរ ។ ទាំងនេះជាខ្លឹមសារ ឬអត្ថន័យស៊ីជម្រៅរបស់ចម្លាក់បុរាណធំសម្បើមទាំងអស់នោះដែលជាការលំអទីក្រុងអង្គរធំ ដោយបង្កើតនូវអត្ថន័យអាថ៌កំបាំងដែលមនុស្សនាសម័យទំនើបយើងនេះពិបាកនឹងយល់ ។
ទន្ទឹមនឹងទស្សនៈនេះ គេក៏អាចនិយាយបានទៀតថា ចម្បាំងរវាងពួកយក្ស និងពួកទេវតាក្នុងក្រសែភ្នែករបស់ខ្មែរបុរាណ គឺតំណាងចម្បាំងរវាងទ័ពចាម និងទ័ពខ្មែរផងដែរ ។ នេះឯងជាបុគ្គលិកលក្ខណៈ និងសារជាតិពិតដែលព្រះមហាក្សត្រព្រះបាទជ័យវរ្ម័នទី៧ប៉ងប្រាថ្នា ។ ដូច្នេះថ្វីដ្បិតតែចម្បាំងមានលក្ខណៈអច្ឆរិយៈក៏ដោយ ក៏បានបង្ហាញព្រឹត្ដិការណ៍ពិតៗនៅក្នុងសង្គមខ្មែរផងដែរ ។ វត្ដមានរបស់វាពិតជាបានជម្រុញឱ្យជនជាតិខ្មែរមានសេចក្ដីក្លាហាន មានមនសិការជាតិ ព្រោះមនុស្សម្នាក់ៗប្រៀបបាននឹងសភាវៈល្អ ពោលគឺទេវតាដែលតំណាងឱ្យមនុស្សល្អត្រឹមត្រូវថ្លៃថ្នូរ ដើម្បីសេចក្ដីសុខចម្រើនរបស់គ្រួសារ និងសង្គមជាតិរបស់ខ្លួន ។
ចំពោះសាសនិកជនបុរាណ គេជឿថាលោកយើងនេះជាល្បែងរបស់អាទិភាពដែលសម្ដែងឡើងដោយកម្លាំង ឬឥទ្ធិពលពីរផ្ទុយគ្នា គឺយក្ស និងទេវតាដែលពុំអាចខ្វះមួយណាបានឡើយ ។ ការសន្និដ្ឋានដោយត្រឹមត្រូវថាចម្លាក់ទាំងនេះពុំមានធ្វើឡើងសម្រាប់តំណាងទេវតាកូរសមុទ្រទឹកដោះទេ ។ សៀវភៅលោកបណ្ឌិត មីសែល ត្រាណេ បានសរសេរបន្ដទៀតថា នៅមុខខ្លោងទ្វារចូលប្រាសាទអង្គរធំ គេឃើញមានពពួកយក្សចំនួន៥៤នៅខាងស្ដាំ និងទេវតាចំនួន៥៤ដូចគ្នានេះនៅខាងឆ្វេង បូករួមចម្លាក់ទ្វារទាំង៤នៅប្រាសាទអង្គរធំ មានយក្ស និងទេវតាដល់ទៅ៤៣២ ។
ការនិយមតួលេខ“៤៣២” ក្នុងគម្ពីរវេទគឺតំណាងចំណេះដឹងខ្ពង់ខ្ពស់ដ៏កំពូល ដោយហេតុថាលេខនេះគឺជាលេខនៃចំនួនគាថាវេទនិយមទាំងអស់ ។ ក្នុងន័យនោះយើងអាចបញ្ជាក់ថាវត្ដមាននៃចម្លាក់ទាំងនេះពុំមែនជាការចៃដន្យឡើយ គឺចម្លាក់មានសារសំខាន់ណាស់ ដើម្បីស្វែងយល់អំពីទស្សនៈខ្មែរនាសម័យបុរាណ ។ និមិត្ដរូបនៃតួលេខទាំងនេះអាចធ្វើឱ្យយើងសន្និដ្ឋានថា ព្រះបាទជ័យវរ្ម័នទី៧បានផ្សារភ្ជាប់អង្គរធំដែលជាសមិទ្ធផលរបស់ព្រះអង្គទៅនឹងទំហំ និងពេលវេលា ។ ធ្វើដូច្នេះ ព្រះបាទជ័យវរ្ម័នទី៧ប្រាថ្នាចង់ឱ្យទីក្រុងអង្គរទឹកដីដ៏បវររបស់ព្រះរាជាណាចក្រកម្ពុជាមានលក្ខណៈជាអមតៈស្ថិតស្ថេរជានិច្ចនិរន្ដរ៍ ដោយគ្មានអ្នកណាមួយមកកំទេចបានទៀតឡើយ ។ ចំណុចស្នូលនៃការរៀបចំអង្គរធំឡើងវិញតាមរយៈចម្លាក់និមិត្ដរូបចម្បាំងរវាងយក្ស និងទេវតាដោយមានតាងលេខ៥៤ ឬ០១១ និង៤៣២ នេះ គឺជាភាពប៉ិនប្រសប់កំពូលរបស់ស្ថាបត្យកម្មខ្មែរបុរាណយ៉ាងពិតប្រាកដ ។
សូមបញ្ជាក់ថា ប្រាសាទមួយចំនួនទ្រុឌទ្រោមបែកបាក់ដោយធម្មជាតិ និងមនុស្សបំផ្លាញក្នុងបរិវេណអង្គរវត្ដបេតិកភណ្ឌពិភពលោកត្រូវបានទទួលការអភិរក្ស និងជួសជុលជាច្រើនមកហើយ រួមមាន ប្រាសាទបាពួន ប្រាសាទចៅសាយទេវតា ស្ពាននាគចូលអង្គរតូច និងប្រាសាទជាច្រើនទៀត ៕
(អត្ថបទដកស្រង់ពីសារព័ត៌មានកោះសន្ដិភាព ថ្ងៃទី២៤/១២/០៨)
រូបចម្លាក់ផ្នែកខាងទេវតា
រូបចម្លាក់ផ្នែកខាងយក្ស
រូបចម្លាក់ទេវតា
រូបចម្លាក់យក្ស
អត្ថបទពាក់ព័ន្ធៈ ស្ពាននាគនៅអង្គរធំ
មានហេតុផលអ្វីខ្លះ ដែលគេនិយាយថា “..ការសន្និដ្ឋានដោយត្រឹមត្រូវថាចម្លាក់ទាំងនេះពុំមានធ្វើឡើងសម្រាប់តំណាងទេវតាកូរសមុទ្រទឹកដោះទេ..”?
Comment by វិចិត្រ — March 9, 2009 @ 10:24 pm